ജാതി ചോദിക്കണം, പറയണം എന്ന പേരില്‍ ഡോ രാജു തോമസ് എഴുതിയ ലേഖനത്തിന്റെ രണ്ടാം ഭാഗം
ദലിതരെ നിരന്തരം വെറുക്കാനും അവര്‍ തങ്ങളുടെ ശത്രുക്കളാണെന്നും അതുകൊണ്ടുതന്നെ അവരെ കൊന്നൊടുക്കാനും (വിചാരധാര, 1981, പേജ് 401) സവര്‍ണഹിന്ദുക്കള്‍ ഉറച്ചുവിശ്വസിക്കാനും അവരുടെ മതം അവരോടാവശ്യപ്പെടുന്നു. (RSS A Vision in Action, 1981, പേജ് 37& Dr Baba saheb Ambedkar, Writings and Speeches വാല്യം 5,1989, പേജ് 412). ദലിതരെ 'ദസ്യുക്കള്‍' എന്ന് ഹിന്ദുപുരാണഗ്രന്ഥങ്ങളില്‍ പരാമര്‍ശിക്കുന്നത് ദലിതര്‍ 'ദാസര്‍' (അടിമകള്‍) ആയതുകൊണ്ടാണ് എന്നാണു പ്രചാരണം. യഥാര്‍ഥത്തില്‍ 'ദസ്യുക്കള്‍' എന്നത് ഇറാനിയന്‍ പദമായ 'ദഹാക്ക'യില്‍നിന്നു വന്നതാണ്. 'ശത്രുക്കള്‍' എന്നാണ് ഈ പദത്തിന്റെ അര്‍ഥം.
ശത്രുക്കളെ എങ്ങനെ കൈകാര്യം ചെയ്യണം എന്ന് ജാതിഹിന്ദുക്കളെ അവരുടെ മതം പഠിപ്പിക്കുന്നുണ്ട്. ശാരീരികമായി ദലിതരെ ആക്രമിച്ചു കീഴ്പ്പെടുത്തിയശേഷം മാനസികമായി തകര്‍ക്കാനാണ് സവര്‍ണര്‍ ദലിതര്‍ക്കെതിരേ മോശമായ വാക്കുകള്‍ പ്രയോഗിക്കാന്‍ തുടങ്ങിയത്. എല്ലാ ഉത്തരേന്ത്യന്‍ സംസ്ഥാനങ്ങളിലും ദലിത് വിരുദ്ധഭാഷ ഇന്നും നിലവിലുണ്ട്. തത്തുല്യപദങ്ങള്‍ നമ്മുടെ മലയാളഭാഷയിലും നിഘണ്ടുവിലും സ്ഥാനം പിടിച്ചിട്ടുണ്ട്. വാക്കുകള്‍ തലച്ചോറില്‍ അര്‍ഥം നല്‍കുന്നു. അര്‍ഥം പ്രവര്‍ത്തനത്തിനു പ്രേരണ നല്‍കുന്നു. ബലിയാടുകളാകുന്നത് ദലിതരും. അങ്ങനെയാണ് 'ദലിത് സ്വത്വം' ദലിതരല്ലാത്തവരുടെ മുമ്പില്‍ കൊള്ളരുതാത്തവരും വൃത്തികെട്ടതും വെറുക്കപ്പെടേണ്ടതും ആകുന്നത്. ഈ ദലിത് വിരുദ്ധമനോഭാവമാണ് എല്ലാവിധ ദലിത് അതിക്രമങ്ങള്‍ക്കും പീഡനങ്ങള്‍ക്കും അവഹേളനങ്ങള്‍ക്കും ഇടയാക്കുന്നത്.
പരിഹാരം
ജനാധിപത്യം നിലവിളിക്കുന്ന ഇന്ത്യയിലും കേരളത്തിലും യഥാര്‍ഥ ജനാധിപത്യം പുലരണമെങ്കില്‍ ഓരോ ജാതിക്കും അതിന്റെ ജനസംഖ്യാനുപാതിക പ്രാതിനിധ്യാവകാശം ഉറപ്പാക്കണം. നമ്മുടെ ഭരണഘടനയില്‍ ഡോ. അംബേദ്കര്‍ ഉചിതമായ പ്രാതിനിധ്യത്തെപ്പറ്റി പറയുന്നുണ്ട്. എന്താണ് ഉചിതമായ പ്രാതിനിധ്യം? എങ്ങനെയാണ് അതിന്റെ മാനദണ്ഡം തീരുമാനിക്കുന്നത്? ഭരണഘടനയില്‍ വ്യക്തിയുടെ അന്തസ്സിനെപ്പറ്റി ആമുഖത്തില്‍ത്തന്നെ പറയുന്നു. ഇന്ത്യയുടെ ദലിത് ആദിവാസി ഒ.ബി.സി കളുടെ അന്തസ്സിനെ നിഷേധിക്കുന്ന ഹിന്ദുത്വത്തെ എന്തു ചെയ്യണം എന്നതില്‍ പട്ടികജാതി കമ്മീഷന് എന്തു പരിഹാരം നിര്‍ദേശിക്കാനുണ്ട്?
പരിഹാരം
ജനാധിപത്യം നിലവിളിക്കുന്ന ഇന്ത്യയിലും കേരളത്തിലും യഥാര്‍ഥ ജനാധിപത്യം പുലരണമെങ്കില്‍ ഓരോ ജാതിക്കും അതിന്റെ ജനസംഖ്യാനുപാതിക പ്രാതിനിധ്യാവകാശം ഉറപ്പാക്കണം. നമ്മുടെ ഭരണഘടനയില്‍ ഡോ. അംബേദ്കര്‍ ഉചിതമായ പ്രാതിനിധ്യത്തെപ്പറ്റി പറയുന്നുണ്ട്. എന്താണ് ഉചിതമായ പ്രാതിനിധ്യം? എങ്ങനെയാണ് അതിന്റെ മാനദണ്ഡം തീരുമാനിക്കുന്നത്? ഭരണഘടനയില്‍ വ്യക്തിയുടെ അന്തസ്സിനെപ്പറ്റി ആമുഖത്തില്‍ത്തന്നെ പറയുന്നു. ഇന്ത്യയുടെ ദലിത് ആദിവാസി ഒ.ബി.സി കളുടെ അന്തസ്സിനെ നിഷേധിക്കുന്ന ഹിന്ദുത്വത്തെ എന്തു ചെയ്യണം എന്നതില്‍ പട്ടികജാതി കമ്മീഷന് എന്തു പരിഹാരം നിര്‍ദേശിക്കാനുണ്ട്?
ഓരോ പട്ടികജാതി- പട്ടികവര്‍ഗ- ഒ.ബി.സി. സമുദായത്തെയും സമഗ്രമായി ശാക്തീകരിക്കുക എന്നത് ജാതി/ സമുദായങ്ങളുടെ മാത്രം കടമയല്ല. അത് ഭരണഘടനാനുസൃതമായി സ്ഥാപിക്കപ്പെടുന്ന ഭരണകൂടത്തിന്റെ കൂടി ബാധ്യതയാണ്. മേല്‍ജാതിക്കാര്‍ എന്നു സ്വയം അവകാശപ്പെടുന്ന ഇന്ത്യയിലെ സവര്‍ണര്‍ മൊത്തം ജനസംഖ്യയുടെ 15.4 ശതമാനം മാത്രമേയുള്ളൂ (Operation World, USA, UK, 2001, പേജ് 309). അവശേഷിക്കുന്ന 85 ശതമാനം ജനങ്ങളും തങ്ങളുടെ സ്വത്വത്തില്‍ അടിയുറച്ചു നിന്നുകൊണ്ട് ശക്തരായി അധികാരം കൈവശപ്പെടുത്തുന്നതിലൂടെ മാത്രമേ അവരുടെ എല്ലാതരം പ്രശ്നങ്ങള്‍ക്കും പരിഹാരം കാണാനാവൂ.
ഒരു സൈക്കിള്‍ ചെയിനിന്റെ ഓരോ കണ്ണിയും തുല്യമാണ്. ഒരു കണ്ണിയെ അവഗണിച്ചുകൊണ്ട് സൈക്കിളിനു സുഗമമായി മുമ്പോട്ടു ചലിക്കാനാവാത്തതുപോലെ ഏതെങ്കിലും ഒരു ജാതി / സമുദായത്തെ അവഗണിച്ചുകൊണ്ട് ഇന്ത്യക്ക് ഒരിക്കലും മുന്നോട്ടുപോകാനാവില്ല. മാത്രമല്ല, കൊട്ടിഘോഷിക്കുന്ന വികസനം എന്നത് ഒരു പ്രഹസനമായി തുടരുകയും ചെയ്യും.
മുട്ടുചിറയിലെ സെന്റ് ആഗ്നസ് സ്കൂളിലെ മാത്രമല്ല, കേരളത്തിലെയും മുഴു ഇന്ത്യയിലെയും ഓരോ വിദ്യാര്‍ഥിക്കും തനതായ ജാതിസ്വത്വമുണ്ട് എന്ന സത്യം നിഷേധിക്കാനാര്‍ക്കു കഴിയും? കേരളത്തിലെ സുറിയാനി ക്രൈസ്തവര്‍ എന്ന പേരില്‍ അറിയപ്പെടുന്നവരുടെ അവകാശവാദം അവര്‍ കേരളത്തിലെ വിദേശീയ ആര്യബ്രാഹ്മണരില്‍നിന്നു മതം മാറി ക്രൈസ്തവരായതെന്നാണ് (Aryans in South India P P 1990, പേജ്, 112).
ഓരോ ജാതിക്കാരനും അവനവന്റെ ജാതിയില്‍ അഭിമാനിക്കട്ടെ. ഓരോ നായരും നമ്പൂതിരിയും തങ്ങള്‍ നായരാണെന്നും നമ്പൂതിരിയാണെന്നും അഭിമാനത്തോടുകൂടി പ്രഖ്യാപിക്കുമ്പോള്‍ അവരുടെ ബലിയാടുകളായ ദലിത് -ആദിവാസി-ഈഴവാദി ഒ.ബി.സികള്‍ തങ്ങളുടെ സ്വത്വബോധത്തില്‍ അടിയുറച്ചു വിശ്വസിക്കുകയും അവരുടെ സ്വത്വങ്ങളില്‍ അഭിമാനിക്കാനുള്ള പോംവഴികള്‍ തേടുകയുമാണു വേണ്ടത്. എല്ലാ ജാതിക്കാരും തങ്ങളുടെ ജാതിസ്വത്വത്തെ പരസ്യമായി പ്രഖ്യാപിക്കാന്‍ തയ്യാറായാല്‍ നിലവിലിരിക്കുന്ന രാഷ്ട്രീയഘടനകള്‍ തകിടം മറിയുകയും മേധാവിത്വ ജാതികള്‍ ന്യൂനപക്ഷമാവുകയും ചെയ്യും.
ഇന്ത്യയിലെ, കേരളത്തിലെ ജാതിപ്രശ്നം (അതൊരു പ്രശ്നമാണെങ്കില്‍) പരിഹരിക്കാന്‍ നഴ്സറി തലംതൊട്ട് ഓരോ പൌരനും സ്വന്തം ജാതി പഠിക്കുകയും ശാക്തീകരിക്കുകയും ചെയ്യട്ടെ. ഇത് ഭരണഘടനയ്ക്കോ മതേതരത്വത്തിനോ എതിരല്ല. ഭരണകൂടസ്ഥാപനങ്ങള്‍ കൈകാര്യം ചെയ്യുന്നവര്‍ മതേതരത്വം സ്വീകരിക്കുക എന്നതാണ് മതേതരത്വംകൊണ്ട് ഭരണഘടന ലക്ഷ്യമിടുന്നത്. ഇന്ത്യ ഒരു മതേതരരാജ്യമാണെന്നു പറഞ്ഞാല്‍ ഭരണകൂടസ്ഥാപനങ്ങള്‍ മതേതരമാകണമെന്നാണര്‍ഥം. അല്ലാതെ പൌരന്മാര്‍ ഒന്നടങ്കം മതേതര ആശയം സ്വീകരിക്കുക എന്നല്ല.
ഇന്ത്യയിലെ ഓരോ ദലിത് ആദിവാസിയും പിന്നാക്കജാതിക്കാരനും ജാതിസ്വത്വമുള്ളവരായി ശക്തരാവാതെ അവര്‍ക്ക് ഒരിക്കലും പ്രശ്നങ്ങള്‍ പരിഹരിക്കാനാവുകയില്ല എന്നു തിരിച്ചറിയണം. ഈ തിരിച്ചറിവ് ഇന്ത്യയുടെ ഉദ്ഗ്രഥനത്തെയും ഐക്യത്തെയും ശക്തിപ്പെടുത്തും. കാരണം, ഭൂരിപക്ഷം ശക്തരാവുന്നതിലൂടെ മാത്രമേ പൂര്‍ണമാനവികത കൈവരിക്കാനാവൂ. മുട്ടുചിറ സെന്റ് ആഗ്നസ് സ്കൂള്‍ അധികൃതര്‍ കാട്ടിയ മാതൃക കേരളത്തിലെ മാത്രമല്ല, മുഴുവന്‍ ഇന്ത്യയിലെയും വിദ്യാഭ്യാസസ്ഥാപനങ്ങള്‍ സ്വീകരിക്കുകയാണു വേണ്ടത്. കാരണം, ഇന്ത്യയിലെ ഓരോ സവര്‍ണഹിന്ദുവും അവരുടെ ജാതിപ്പേരില്‍ അഭിമാനിക്കുകയും ഊറ്റംകൊള്ളുകയും ചെയ്യുന്നേടത്തോളം അവരില്‍പ്പെടാത്തവര്‍ക്ക് അവരുടെ ജാതിബോധം നഷ്ടമാവുന്നു എന്ന സാമൂഹിക മനശ്ശാസ്ത്രത്തെ നിഷേധിക്കാനാര്‍ക്കും കഴിയുകയില്ല.
പട്ടികജാതി- പട്ടികവര്‍ഗത്തില്‍പ്പെട്ടവര്‍ക്ക് ജാതിബോധം ഉണ്ടാവാനുള്ള നടപടി സ്വീകരിക്കണം. ഒന്നാംക്ളാസില്‍ ചേരുന്ന ഓരോ കുട്ടിയും താന്‍ ആരാണെന്നു സ്വയം തിരിച്ചറിയുകതന്നെ വേണം. അവരുടെ ഇനിയും എഴുതപ്പെട്ടിട്ടില്ലാത്ത ചരിത്രം കണ്ടെത്താന്‍ ആ സ്വത്വബോധം അവരെ സഹായിക്കും. ഈ വിഷയത്തില്‍ ഒരു തുറന്ന സംവാദത്തിനു കേരളസമൂഹം തയ്യാറാവുമോ? അതിനുള്ള ബൌദ്ധികസത്യസന്ധത കേരളസമൂഹത്തിനുണ്ടോ?
ജാതിക്കെതിരേ ഉറഞ്ഞുതുള്ളി വേദികള്‍ ഇളക്കിമറിക്കുന്നവര്‍ക്ക് എന്‍.എസ്.എസ്, എസ്.എന്‍.ഡി.പി എന്നീ ജാതിസംഘടനകളെ നിരോധിക്കണമെന്നാ വശ്യപ്പെടാനുള്ള ധൈര്യമുണ്ടോ? കേരളത്തില്‍ നിലവിലിരിക്കുന്ന (ഇന്ത്യയിലും)പേരുകള്‍ക്കൊപ്പമുള്ള 'വാലും' 'നൂലും' നിരോധിക്കാനാവുമോ? അവര്‍ണര്‍ ജാതീയമായി സംഘടിച്ചു ശക്തരാവുന്നതില്‍ എന്തിനിത്ര അസഹിഷ്ണുത? സവര്‍ണര്‍ ജാതീയമായി സംഘടിക്കുന്നത് 'ദേശീയതയും സംസ്കാരികദേശീയതയും' ആണെന്നു വാദിക്കുന്നവര്‍ അവര്‍ണര്‍ 'ജാതീ'യമായി സംഘടിക്കുന്നതിനെ പരിഹസിച്ച് 'വര്‍ഗീയതയായി'മുദ്രയടിക്കുന്നു. അവര്‍ണര്‍ അധികാരവും സമ്പത്തും വേണമെന്നു പറയുമ്പോള്‍ അത് 'ദേശവിരുദ്ധമാവുന്നു,' രാജ്യദ്രോഹപരമാവുന്നു! കോടാനുകോടി വര്‍ഷങ്ങള്‍ പിന്നിട്ടാലും ഇന്ത്യക്ക് ഒരു 'ജാതിരഹിത'രാജ്യമായിത്തീരാന്‍ കഴിയുമോ എന്നു സംശയമാണ്. ബ്രാഹ്മണാധിപത്യ ഹിന്ദുയിസം നിലനില്‍ക്കുവോളം ജാതിയും നിലനില്‍ക്കും. കമ്മ്യൂണിസത്തിനു ജാതിയെ ഇല്ലാതാക്കാനാവുമോ?
ജാതിസ്വത്വം ശക്തമാവട്ടെ, അതിനെതിരേയുള്ള അട്ടഹാസങ്ങള്‍ കപടമാണ്, വഞ്ചനയാണ്. നമ്മുടെ രാജ്യത്തു ജീവിക്കുന്ന ശര്‍മമാരും വര്‍മമാരും ചതുര്‍വേദിമാരും ചാറ്റര്‍ജിമാരും റെഡ്ഢിമാരും പിള്ളമാരും മേനോന്മാരും വാജ്പേയിമാരും ലിംഗായത്തുകളും അയ്യര്‍, അയ്യങ്കാര്‍മാരും നമ്പൂതിരിമാരും നായന്മാരും ത്രിവേദിമാരും ബാനര്‍ജിമാരും മേനോന്‍ ജാതിയില്‍പ്പെട്ട കാരാട്ടുമാരും അവരുടെ ജാതിപ്പേരുകള്‍ ഉപേക്ഷിക്കാന്‍ തയ്യാറാകാത്തിടത്തോളം 'ജാതി'രഹിതമായ ഒരു ഇന്ത്യയെപ്പറ്റി സ്വപ്നംകാണാന്‍ പോലും നമുക്കാവില്ല. ഡോ. അംബേദ്കറുടെ വാക്കുകളില്‍, ഇന്ത്യക്കാര്‍ക്ക് ഒരു 'ദേശീയജനത'യായി മാറാനുള്ള സാധ്യതയുണ്ടോ എന്നു വിലപിക്കാന്‍ വിധിക്കപ്പെട്ടവരാണു നാം.
(അവസാനിച്ചു)
(അവസാനിച്ചു)
ലേഖനത്തിന്റെ ആദ്യഭാഗത്തിലേക്കുള്ള ലിങ്ക്:
